لازال هناك ضوء امل في اداء الليبيين
مساء الخيرات يا مدمنين البلوقز .... كنت انبصر ما تفهمونيش غلط ... قصدي يا مشتركي البلوقز ... انا اعتذر على مقاطعة الاجزاء الخاصه برحلتي لفرنسا بس عندي (كومينت) على برامج شهر رمضان في القناة الجماهيرية ... اليوم 26/09/2007 و اللي ايصادف 15 رمضان و كل سنه و انتوا طيبيين .... اليوم ما كانش خاطري في العمل بشكل جدي فكنت كل مره انشد حاجه و نشتغلها على مهلي لدرجه اني وصلت للمل و منها قلت خليني نقرا بعض البلوقز ... فلقيت حاجات حلوه و انحب نقر التعاليق الخاصه ببنغازي بما اني كنت وحده منهم و لا زلت بالاسم منهم بحكم هنا في طرابلس مزالوا ايقولولي يا شرقاوية... و من غير اي مجاملات التعاليق كانت صحيحه و واقيعية ... ان بنغازي تغييراتها من كترت ما هي صغيره لين الواحد مايحسش بيها و حتى كان نسال جماعتي ايقولوا و الله كيف ما خليتيها قاعده زي ما هي ... عموما مش هدا موضوعي لاني متاكده انه حيجي يوم و حتتغير بشكل ملحوظ ... الواحد ديمه لازم ايخلي شمعة امل ضاويه في نفسه .... المهم عوده لمحور موضوعنا اللي هو: تعليقي خاص ببرامج ليبيا عالجماهيره من اول ما يبدا برنامج الحاج مبروك لعند ما نوصلوا للكاميره الخفيه ... زي ما اغلب متتبعي هالبرامج اكيد ملاحظين الفضيحه اللي صايره من جانب الشراقا في التمثيل ... و الله حرام عليهم كيف شوهوا صورتنا هكي قدام الغرابه .. اداء رديء جدا و افكار تافهه جدا و اشكال الله غالب فيهم لما يبو ايقلدوا شخصيات غربيه او ايا كان و ..و ... ووو ... لدرجه مش حنكفي و لا انوفي!!! اعطيتهم فرصه لعند نص رمضان و البرامج استمرت اتكون مخجله جدا جدا جدا من غير اي تطور ... الحاجه الوحيده الكويسه هي الكاميرا الخفيه لانها تجسد الحقيقه مش مجرد تمتيل عشوائي ... انا متاكده اننا عندنا من عندهم كفأات غير مش محصلين فرصه ... توه معقوله سنه بحالها مش قادرين ايديروا ثمره في عمرهم ... واقسم بالله لما نفطروا عالصفرة الا و الدنيا كلها اتعلق عليا بشكل يومي ... (( ووك علينا !!! خيركم يا شراقا مصمطكم و النبي غيروا و حطولنا حتى السودان و راضيين بيهم و لا نشبحوا الشكالات هادي )) و الله لا معاهم حق ... حشمتوووووووووني قدامهم يالاذاعة.... اااهههههه و يا اااهههههه عالقهر ... الى متى حنظلوا على هدا المنوال؟؟؟ الى متى .... صح انا حاسه روحي شايطه في هالموضوع ربما اكتر من اللازم ... بس نرجع انقول مزالت عندي شمعه امل فيهم و بالك حد منهم يقرا هالتعليق و مانضنش ابدا !!!! المهم انه الكلام يوصلهم .... سامحوني على المقاله هادي بس شكلي صايمه حق اليوم و جوي متلخبط.
ياله يكفي ما قلت لاني حسيت ان قلبي برد توه و لقيت من يقراني ... هههههههه
سلام .. و تابعونا في التهجم المقبل على خطوط البراق..
1 comment:
hi dear tatouna, I'm not surprised of what you said, althogh I'm here in Ireland I don't have the libyan channel, but I can imagine what it could be for benghazi programms, and the really problem is not here, there are really very nice people, talented in benghazi who can make incredible shows, I know few at the University, and there must be much other, but it's always like this in libya, the wrong man in the right position, when it comes the time where the right man will be in the right position????
Post a Comment